2Cor 9 | YML | STEP | A 'asetami ma yami dumwebika nuanuami 'wa na 'anivelena-maimaiga tovetumaganavo 'adi 'aivaita faifaina, begaidi kebu i da lubwaineku faifaina a na kiluma manamanawena 'waimie. A awa'ai'aimi me Masidonia 'waidie a vo, Me Kolinita wata 'ifwaidi tovetumaganavo 'awalawa Gulisi nageneye taiadi, malamala i 'a'avaga 'waineye yadi nuanua i 'idewai 'anivelena-maimaiga faifaina.” Yami dumwebika valana me Masidonia i nogai, nika sai'afo matatabudi wata i dumwebika 'anivelena-maimaiga faifaina.

2 Corinthians 9

Yaubada nuanuana ma yada sosoana ta na 'anivelena-maimaiga.

1 A 'asetami ma yami dumwebika nuanuami 'wa na 'anivelena-maimaiga tovetumaganavo 'adi 'aivaita faifaina, begaidi kebu i da lubwaineku faifaina a na kiluma manamanawena 'waimie. A awa'ai'aimi me Masidonia 'waidie a vo, Me Kolinita wata 'ifwaidi tovetumaganavo 'awalawa Gulisi nageneye taiadi, malamala i 'a'avaga 'waineye yadi nuanua i 'idewai 'anivelena-maimaiga faifaina.” Yami dumwebika valana me Masidonia i nogai, nika sai'afo matatabudi wata i dumwebika 'anivelena-maimaiga faifaina. 3 Yama awa'ai'ainina kebu nuanuama i na vo, I vekali,” begaidi edavo 'adi 'aitonu a vonedi i na waia bega yadi 'aivaita 'wainega yami 'anivelena-maimaiga 'wa na yato. Tutuyanina 'a na wai 'a na 'isemi yami 'aivaitanina 'wa 'idewai i 'eno'eno, basenadi a vona bani'odi. 4 'Ai'edi me Masidonia 'ifwaidi taiadi 'a da waiga 'waimie 'a da 'iseni kebu 'wa da yatoga 'ima 'a da bunumayaga 'a vetumaganemiga faifaina, we'e 'omi 'wa da bunumayagaotoga. 5 Fai kebu nuanuama ta na bunumayaga begaidi a nuanina edavo a vonedi i na kumeta i na waia bega yadi 'aivaita 'wainega yami 'anivelena-maimaiga basenadi faifaina 'wa vona'awaufaufa 'wa na 'idewai i na 'eno'eno. Mulieta tutuyanina 'a na waiga 'a na 'isenina nika 'a na 'asetai 'omi to'anivelena, we'e kebu nuanuaku 'a na wai 'a na lueloelomi.

S1 2 Kol 8:1-7

Ta na yatoga bwaikina wata bwaikina ta na veluagai.

6 'Ana 'aseta side bani'odi, 'ai'edi aitoi waifei siaina i na koyovi, wata 'aiala 'waineye 'ani'ani siaina i na veluagai. We'e 'ai'edi aitoi waifei bwaikina i na koyovi, wata 'aiala 'waineye bwaikina i na veluagai. 7 Begaidi i lubwaineni tomotoga 'aitamogana 'aitamogana yana nuanua 'waineye i tauyeniga bani'odi i na yato. Kebu ma yana nualolo 'wainega i na yato wata kebu lukakada 'wainega, we'e mogitana ma yana sosoana i na 'anivelena, fai egavo ma yadi sosoana i 'a'anivelena, Yaubada i nuakalikaliedi. 8 Naninidi 'waidie 'wa ve'ale'usa, Yaubada 'ana fata i na velevelemi nika tutuya matatabuna 'ami fata, siwe wata ma 'adi 'imoso'i bega 'ami fata 'waidiega tomotoga fuedi 'wa na 'i'ivaisedi. 9 Tamu vona i 'eno'eno Yaubada yana Buki nageneye to'anivelena faifaidi i vo,

Yana nuakalikali fuedi i luyavuyavuledi wekowekoma 'waidie.

Yana sauluvanidi tonovidi 'adi nuanua kebu i na 'a'avaga i na 'eno-vagata.”

10 Yaubada waifei i veleda bega 'ada fata ta na koyova, taunina 'adi tokiavevuaga nika 'ani'ani ta veveluagadi. Wata bani'odi Yaubada i na 'a'anivelena 'waimie wata naninidi i na 'i'imoso'iedi i na nagoga yami 'anivelena vuagidi i na vevebwaika. 11 Yaubada i na 'i'ive'ai'aiwabumi nani matatabuna 'waidiega bega tutuya matatabuna 'wa na 'a'anivelena nika tomotoga fuedi i na vekaiwa Yaubada 'waineye yami nuakalikalinidi faifaidi. Nuakalikalinidi 'a na 'ewadi 'waimiega mali tomotoga 'a na veledi.

12 Yami 'anivelena-maimaiga 'wainega nani 'ailuga 'atumaidi i sousouyedi. Tamu, Yaubada yana tomotoga ava'ai 'waidie i 'usaga 'wa 'i'ivaisedi, 'ana veluaga, tomotoga fuedi Yaubada 'waineye i vevekaiwa nuakalikalinidi faifaidi. 13 Tomotoga fuedi yami 'anivelena-maimaiga i na 'iseni Yaubada i na subiai i na vo, Me Kolinita Keliso faifaina i lulu'ivona, siwe wata i vevematayakeyakeni. Yadi vematayakayakanina vuagina ta 'iseni i 'a'anivelena 'waideye wata mali tovetumaganavo 'waidie.” 14 Tomotoganidi ma yadi nuakalikali i na vevelu'ui faifaimi fai 'ami nuakalikali bwaikaotogina Yaubada i velemiga, 'waidiega 'wa 'ivaisedi. 15 We'e Yaubada, Natuna i 'aniveleneni 'waideye, yana nuakalikalinina bwaikaotogina kebu ta na vona, begaidi ta na subiai.

S6 Voa 11:24S9 Same 112:9S10 Ais 55:10 Ose 10:12